Cynhyrchwyd gan dîm Deieteg Dechrau’n Deg – Rhagfyr 2023
Mae Dechrau Coginio yn gwrs coginio ymarferol sy’n rhan o’r Rhaglen Sgiliau Maeth am Oes (NSFL), wedi’i achredu ar lefel un a werth dau gredyd (20 awr o ddysgu dan arweiniad). Mae’r cwrs yn cefnogi unigolion i ddatblygu eu sgiliau coginio a’u gwybodaeth am ddeiet cytbwys fforddiadwy, iach, y gallant ddefnyddio yn eu bywydau bob dydd ar gyfer eu teuluoedd. Mae gan gyfranogwyr y cwrs gyfle i wneud o leiaf 12 rysáit iach, cost-effeithiol sy’n gyflym, yn hawdd ac yn flasus.
Caiff Dechrau Coginio ei gyflwyno i rieni a gofalwyr sydd â phlentyn/plant o dan 4 oed ac sy’n gymwys ar gyfer rhaglen lawn Dechrau’n Deg Caerdydd. Cyflwynir y cwrs gan Gynorthwyydd Deietegol a’i gefnogi gan Nyrs Feithrin Gymunedol. Cynhelir y sesiynau 2 awr unwaith yr wythnos am 8 wythnos, gyda sesiwn ychwanegol Caru Bwyd Casáu Gwastraff. Mae’r rhai sy’n cymryd rhan yn derbyn llyfr ryseitiau a bag nwyddau am ddim, yn cynnwys offer coginio sylfaenol, pan fyddant yn cwblhau cwrs Dechrau Coginio Dechrau’n Deg Caerdydd.
Sut glywsoch chi am y cwrs?
Cefais wybod am y cwrs trwy fy ymwelydd iechyd Dechrau’n Deg.
– Y ddau
Pam wnaethoch chi ymuno â’r cwrs Dechrau Coginio?
Gan ei fod yn rhad ac am ddim ac roeddwn i’n meddwl y byddai’n syniad da i ddiweddaru fy sgiliau coginio.
– Dad 1
Roeddwn i eisiau dysgu sgiliau newydd a chael syniadau am sut i goginio prydau iach ar gyllideb. Roeddwn i eisiau gwneud rhywbeth i fi fy hun hefyd, felly roedd cael meithrinfa Dechrau’n Deg yno i’r plant yn anhygoel.
– Dad 2
What did you enjoy most about the course?
Roeddwn i’n hoff o’r ffaith ei fod yn ymarferol yn bennaf. Roeddwn i hefyd yn mwynhau cwrdd â rhieni eraill.
– Dad 1
Roeddwn i mor ddiolchgar ei fod yn gwrs ymarferol yn bennaf. Roedd hyn yn ei wneud yn fwy o hwyl.
– Dad 2
A oedd unrhyw beth a oedd yn eich synnu/poeni/plesio am y cwrs?
Roeddwn i’n meddwl bod y cwrs yn dda iawn. Roeddwn i’n arbennig o hoff o wneud y talpiau cyw iâr gan fod y rhan fwyaf o bobl yn tueddu i brynu’r rhain wedi’u rhewi.
– Dad 1
Yn wreiddiol, roeddwn i’n pryderu mai fi fyddai’r unig dad yno, ond roedd pawb yn gyfeillgar ac fe wnes i fwynhau pob rhan o’r cwrs.
– Dad 2
Beth ydych chi wedi’i ddysgu o fynychu’r cwrs?
Roedd yn fwy o broses atgoffa i mi gan fy mod eisoes yn ymwybodol o’r rhan fwyaf o’r sgiliau coginio.
– Dad 1
Rwyf wedi dysgu cryn dipyn, er enghraifft sgiliau cyllell diogel. Rwyf bellach yn ei gweld hi’n haws dilyn rysáit ac yn fwy hyderus yn coginio prydau iach, cost isel.
– Dad 2
Ydych chi wedi gwneud unrhyw newidiadau ers mynychu’r cwrs?
Rydym eisoes yn coginio llawer yn ein tŷ ni, ond rhoddodd y cwrs syniadau am brydau mwy iach ac rwy’n bwriadu newid rhai pethau mewn ryseitiau i’w gwneud yn iachach; pethau na fyddwn wedi meddwl amdanynt o’r blaen.
– Dad 1
Rwy’n pobi bara gartref nawr ac yn gwneud y Dip Raita hefyd. Rwy’n well am roi cynnig ar fwydydd newydd ac, o ganlyniad, mae fy mab wedi bod yn rhoi cynnig ar fwy o fwydydd newydd hefyd. Rwyf hefyd yn cynnwys mwy o lysiau yn fy neiet ac yn defnyddio perlysiau i ychwanegu blas i’m prydau bwyd yn lle halen.
– Dad 2
Sut ydych chi’n meddwl y bydd yr hyn a ddysgwyd ar y cwrs o fudd i chi yn y dyfodol?
Mae’r sgiliau a ddysgais yn mynd i fod yn ddefnyddiol iawn yn fy ngwaith wrth goginio gyda phreswylwyr mewn llety a gynorthwyir. Fe wna i rannu’r ryseitiau gyda rhai o’r bobl yn y gwaith.
– Dad 1
Rwy’n mynd i fwyta’n iachach. Roedd mynd allan o’r tŷ a gwneud rhywbeth i fi fy hun o fudd hefyd, ac wedi helpu gyda fy iechyd meddwl.
– Dad 2